live tv

GEO ENTERTAINMENT WEEKLY DRAMAS REVIEW

Geo Entertainment, naazreen ka pasandeeda aur maqbool tareen channel hai jo hamsesha se hee zabardast dramay nashar karta aa raha hai. Yehi wajah hai ke nazreen humein be-inteha sarhatay hain. Iss haftay Geo Entertainment ki screen par kia kuch hua, jannay ke liye parhein aik Weekly Dramas Review.

 

Sunday ka ikhtitam hota hai "MorMahal" ki royal episode ke sath, iss haftey hui Shahzadey Shuja’at ki entry, jis ko nazreen ne dekha ek bigray huay shahzaday ke roop mein. Jahan ek taraf Nawab Asif Jahan ki samajhdari aur sanjeedgi se Jahanabad salaamat hai, wahin Sarwat Jahan Shuja’at ko wali-ehd bananey ka irada rakhti hain. Meherbano ki mohabbat may Shahzada Shuja’at kya qadam uthata hai, yeh jannay ke liye naazreen ko agli qist ka shiddat se intezar hai.

 

Sunday aur Monday ki shaam dhaltay hee Geo ka drama serial "Shaam Dhalay" naazreen ki tawajah ka markaz bann jata hai. Baap ki mout ke baad zindagi ki mushkilaat ka saamna karti yateem betiyoon ki kahani jo soutaili bhabhi aur chaalak business lawyer ki ziadti seh rahi hain. Alina kay hoslay aur samajhdari se bharpur kirdar ko khawateen ne apnay liye aik inspiration bana liya hai.

New Timings: Sunday to Tuesday at 9:00 PM

 

Monday ki raat, "Mannchali" ne kia nazreen ko purlutf! Ambreen ki nat-khat harkaton se sara ghar tou pareshan hai hee, ab tou uss ne apnay honay walay mangetar aur uss ke maa baap ko bhi nahi chora. Oot patang kapron se le kar cigarette peeney tak, iss larki ne kuch nahi chora! Monis bhi Seema se ziada Ambreen ko sochnay laga hai. Dusri taraf Afsheen aur Arham ki mangni ke din qareeb aa rahey hein. Dekhte hein iss baar sab sahi se hota hai ya phir se karti hai Ambreen koi nayee shararat Suraiyya aunty ke saath.

 

Geo Entertainment ka aik aur dilchasp drama serial "Sangdil" jo ke teen markazi kirdaar Zohaib, Sofia aur Zobia ke gird ghoomta hai. Aaj kal baray shouq se dekha ja raha hai. Zobia naaye hat-kanday istemaal karkay Sofia ki mohabbat (Zohaib) ko cheennay ki sar torh koshish kar rahi hai.

 

Tuesday ki raat anay wala Drama "Wafa" us waqt mazeed dilchasp bann gaya jab aik pur-tajassus kirdaar ne Daniyal se call par baat ki. Qurbani aur esaar ka paikar Wafa musalsal mushkilaat ka shikar hoti ja rahi hai. Woh Daniyal aur apnay ghar walon ke beech ulajh si gai hai. Idhar, Umair aur Maham ke darmiyan ghalat-fehmi ki deewar khari ho gai hai jis ki wajah Hashir ban gaya hai. Mansha Pasha ki dil moh lenay wali adakari aur Babar Ali ki pur-wajeeh shaksiyat ne iss drama ko char chand laga diye hain.

 

Wednesday ko Geo Entertainment ke nazreen "Iss Khamooshi Ka Matlab" ki gharailu kahani se mehzooz hotay hain. Zainab apni mohabbat aur bachpan ki teh-shuda shadi mein ulajh si gai hai. Khandani paichidagiyon aur ranjishon se mazeed gehri hoti ja rahi hai. Iss dramay mein bohat se manjhay huay fankaar aur khoobsurat Aiman Khan apni acting ka jadu jaga rahay hain.

New Timings: Wednesday & Thursday at 8:00 PM

 

 

"Noor Jahan" Geo Entertainment ki aik aur maqbool hota serial hai. Noor Jahan ki talaq ke baad apnay maikay aa gai hai magar shayad ab bhai aur bhabhi ko uss ka wajood khal raha hai. Youn lagta hai shohar ka saath kho janay ke baad ab Noor Jahan ka saibaan bhi kho jayega.

 

"Sila Aur Jannat" 2 behno ki kahani hai jo ke baap ki wafaat ke baad halaat se samjhota kar rahi hain. Jannat apni behen Sila ko shaadi ke baad apnay saath rakhna chahti hai magar Jannat ki saas ne yeh shart mannay se saaf inkar kardia.

 

DEKHTAY RAHIYE GEO ENTERTAINMENT !